さんねんのひみつ (三年の秘密)

我一向好少响人前講關於自己的感情事，真係除非識咗10年以上的朋友之外，其他人我都隻字不提，一來因為我同那班朋友的感情已昇華到視大家如親兄弟姊妹的地步，無所不談！二來事過情遷，舊事重提又有咩用呢...？今次我諗住寫少少少少少關於自己的珍藏全因為受到A小姐的感染，佢最近因感情生活的唔如意而好唔開心，我見到佢就令我諗返起我對上一次分手的時候，當然個case就好唔同啦，不過我同佢的反應都一樣﹝可能我仲勁過佢tim﹞！

首先我想澄清咗我仲係SINGLE先呀！！唉... 上天對我有時又刻薄咗少少嗃，俾咗我一副咁可愛的面孔後﹝尤其係我對冇畫eyeline等於有畫eyeline的*dreamy eyes*﹞後就惹嚟一連串的誤會... 我知道好多人都以為我係嗰D拍緊拖但成日响外面*sa-sa滾*，玩完就飛人，鐘意拍散拖及鐘意玩ons的人，所以好多人都唔敢對我放開懷抱就走喇！哼... 佢哋仲以為自己好醒諗住冇上錯賊船，哈哈.. 出面都唔知有幾多披住羊皮的狼呀... :P 嗱嗱嗱... 如果你都係咁諗我呢就完全錯晒，雖然我成日口花花咁，但我敢講我係一隻100%擔屎都唔偷食的貓嗃，唔口花花就悶*do*死你啦... 呵呵呵...

三年前... 呀呀唔係... 係四年幾前的一個秋天，我遇上咗我個ex﹝點遇就唔講喇...﹞，我哋係一見鍾情架，好多野都好夾又有好多common interests嗃﹝雖然佢唔識中文又唔知道邊個係莫文蔚，但佢都好鍾意聽Karen的歌架﹞；另外，我哋好respect對方，亦都盡量去互相適應同share睇法及見解，同時我哋又係好buy浪漫的人，鍾意俾surprise大家，但我哋唔會在朋友面前態度過份親暱，親暱的只會在家中分享。記得有一次佢話要煮飯俾我食，入屋前佢叫我唔好開門住，佢yell咗幾次*just a second*但我就足足等咗成三分幾鍾，我仲講笑話：「are you hiding somebody in there? you wanna try threesome tonight?」門打開前，佢叫我合理雙眼然後帶到我入廁所，我一打開雙眼就見到全屋都熄晒燈﹝除了廚房﹞，廁所裡點滿晒香薰蠟燭，原來佢run咗個bubble bath俾我浸，仲有杯冰凍的white wine tim :P 跟住佢就去煮飯，煮完飯就叫我出去囉！依個只不過係我哋生活上的其中一個surprise... 仲有好多好多...

直到三年前多少少，因佢有事要搬返英國，我就陪佢返... 可能佢嗰個moment太忙陪唔到我，我就成日同其他friend一齊週圍去，結果足足幾個禮拜我哋都見唔到3/4次，終於.... 我發脾氣喇.... 開始講埋一D悔氣野，越講就越認真，加上我當時諗... 佢又想我搬過去陪佢但我又唔可以放棄香港的學業，不如做朋友算啦.... 我就一意孤行，冇正式坐低傾過，純粹inform佢我就走咗。返香港時，我未上機就喊到落機*non-stop-crying*，回家途中已喊到冇水出，我就*以為*自己開始可以接受到做返friend依個mode。直到一兩個月後我收到佢第一個、第二個、第三個email，我先realize我真係未放得低，但我冇同佢講我點諗因為佢好似已經move on緊 lu，mmm... 可能當初我走得太突然同埋我錯過咗佢好唔開心嗰part啩，所以佢可以make up佢個mind咁快？？我可以回覆佢的只係一D好好好simple的email and that it！佢最後的email係話佢覺得我變咗，估我連朋友都唔想做等等，之後我哋就再冇聯絡lu...

眨下眼就三年，依三年裡面我冇拍拖，亦冇白過，反而學識咗咩叫*愛*同*珍惜*﹝包括親友﹞。起初我真係有少少後悔當時那種衝動、幼稚、唔識珍惜的性格同埋唔負責任的行為，因為咁我有一段時間都會幾憎自己。由欲哭到無淚，由得閑無事就望住個天諗*where are you?*到望返住自己諗*where am I?*，由回望到盼望... 諗深一曾如果冇依件事發生，我亦冇依個機會去用咁長時間嚟反省，冇依個機會去成長啦，係咪！？我知道終有一日我一定會見到同我牽著同一條紅線的那個人，每個人都會！ 唔好再為過去的而皺眉啦！YEAH！！

***忽然提問：點解每當一棵大樹冇晒葉的時候就有人會話：「棵樹都冇晒葉啦！」而當一棵大樹生得好茂盛的時候就冇人會話：「嘩~ 你睇棵樹好多葉嗃！」呢？係唔係因為有D野一定要錯過咗先識欣賞？

*****特別鳴謝朋友V幫我打個Title的日文字！