明月一輪‧圓滿中秋

雖然很累，但是值得的。

這個中秋燒烤活動終於完滿結束，出席的人數不是很多，卻總算高朋滿座，感覺仍一樣親切，氣氛依然。成就我們渡過這歡愉的時光，還是要感謝朋友C的朋友K，若不是他的慷慨，願意借出這溫馨小窩，恐怕都未能有機會享受這個月光浴! 謝謝!

中秋為中國情人節，人月兩團圓，除了我和主人家的那隻黑毛尋回犬外，每個人都是成相成對，有的已結婚、有的將會結婚、有的仍然蜜運中、有的新歡上陣，自己心底裡也不禁替他們開心起來，更想起鄧麗君的... "人有悲歡離合，月有陰晴圓缺，此事古難全，但願人長久，千里共嬋娟。" 送上祝福。

2008年的中秋節，一切圓滿!

諷刺文盲：喜出望外 (中秋節快樂版)

是日精選【喜出望外】xi chu wang wai

解釋: 遇到出乎意料的好事而特別高興。(望外：期望或意料之外。)

J例: 每年嘅中秋節，BBQ對我嚟講係一個不可缺少嘅節目，因為我喜歡熱鬧，而BBQ正正可以產生出非常好嘅氣氛... 不過，前幾日我收到一個通知，由於地方問題，今個中秋節嘅BBQ要取消!!! 當時我的確有一點兒嘅失落，唉... 每逄佳節倍思春(春即指小弟尚青春嘅時候...)，不禁令我諗起以前中秋都會同一班朋友到西貢大坳門BBQ、講鬼故、發癲一番。直到今晚，我同J Family做節，我個最好朋友C話另一個朋友C個朋友K嘅屋企available，我哋可以去佢屋企燒嘢食食食食，呵呵呵呵呵呵呵呵呵呵呵呵呵~ 實在令我喜出望外，嘻嘻嘻嘻嘻!!! :P:P:P:P:P:P:P 祝大家中秋節快樂!!!

Movie Review: 10 Promises to My Dog 我和尋回犬的十個約定

今晚啱啱去完《10 Promises to My Dog 我和尋回犬的十個約定》嘅首映，去之前已經同朋友W講：「我一陣唔睇得咁投入應該okay!」睇完之後我第一句就講：「仆街... 我以後唔睇依啲戲!」因為我又係喊到豬頭咁行返出嚟... 套戲好好睇，好感人，我相信佢比起《導盲犬小Q》已經冇咁慘! 其實我覺得套戲可以啟發觀眾嘅唔單只係*愛狗*嘅訊識咁簡單，仲可以啟發到觀眾對佢哋所愛嘅任何嘢(可能係寵物、朋友、父母、男/女朋友等等...)嘅責任，唔好愛得太遲，因為人都只係活响時間裡面，每個人都有限期...

Ohohohoh... 唔好講得太遠，um... 我覺得特別適合想養小動物同一啲有寵物嘅人去睇，因為佢喺度educate緊觀眾點去對小動物有責任之餘，亦係remind緊你有幾愛你而家嘅寵物，以當中嘅*愛犬十誡*作警惕同反省。而身為主人嘅我，覺得自己都有80-90分嘅...

愛犬十誡 (以動物為subject...)：

1. 請耐心聆聽我的話語 (我相信如果你真係have this thing about animals，你好自然就會明白依一點。我覺得可以理解為同理心。)

2. 相信我，因為我一直都與你同一陣線 (我由小丙2個月大就已經養佢，好難會唔信架嗃...)

3. 經常和我遊玩 (依樣係我唯一對唔住我BB嘅一樣嘢，佢細個嗰時我冇帶佢出街，搞到大個咗佢唔鍾意出去，一抱佢出門口佢就扮無力一嘢就瞓低! 不過，我每日响屋企都會同佢玩，有時我甚至唔出街都係想留多啲時間陪佢，特別係依幾年!)

4. 別忘記我也有感情的 (都係嗰句，如果你係對動物有*FEEL*，只要細心觀察，好容易就會sense到佢哋嘅喜怒哀落同知佢想點囉!)

5. 不要和我打架，因為終有一天我長大了，我便會贏的 (我好少打BB，因為唔捨得... :P)

6. 我不聽話的時候，一定是有原因的 (依個我信，因為動物嘅反應係最真嘅! 所以我俾BB咬我塊面2次，每次要縫7-8針我都冇怪佢! hehe!)

7. 你上學，有朋友，但是我... 就衹有你 (當我每次出國，一落機我最想見唔係任何人，而係我個BB!)

8. 我老了以後亦請繼續做我的朋友 (OF COURSE!!!)

9. 我衹活大概十年，所以要珍惜一起生活的每一刻 (依個係我近年成日諗嘅問題，BB差唔多已經15歲，身體機能開始退化，雙腳開始無力... 帶佢去睇獸醫，獸醫都話係老狗病，我可以做嘅就係令佢開心過每一日，同埋學習面對生離死別... V_V 不過好彩佢冇啲咩病痛!! THANK GOD!!!!)

10. 我不會忘記一起渡過的日子，我死的時候，請留在我的身邊 (聽人講如果啲狗係好鍾意個主人，佢哋死嗰時係唔會俾個主人見到... 不過點都好，我就算點唔開心同難過，我都唔會俾BB咩嗰時係自己一個...!!!!!!)

**請留意圖中隻貴婦狗個頭係正方形!!! hehehehe!!!

四川第五天：十里不同天

話明standby就梗係晨咁早仆起身等通知航班嘅消息right?! 咁我哋就0630到餐廳邊食邊等安排... 直到0700，終於有最新航班嘅消息，不過... 機場就... 落雪! 嗄?! 完全諗唔到點解會無端端落雪，我哋望出窗口都只係落緊毛毛雨，而酒店同機場又唔係差好遠... um... 依獲真真正正見識到四川嘅*十里不同天*之妙! 十里不同天指十里外天氣嘅變化可以係完全唔同，仲有人話九寨溝係一個一日可見四季之地，真係點都料唔到當今世上仲有一樣嘢可媲美小弟心情嘅變化!! 呵呵呵!!

沿途到機場嘅時候，有個重慶女人講電話，佢好大聲咁講話：「這個九黃機場(即九寨溝黃龍機場)有十架飛機九架黃，還有一隻要折返!」哈哈哈哈哈哈哈哈哈... 笑Q死!!! 冇幾耐就停咗雪，最後，我哋當然好順利咁飛返香港... 希望四川嘅前景亦都會同佢嘅天氣一樣*十里不同天*啦!

四川第四天(下集)：一次難忘

行完黃龍，原定今晚搭飛機返成都，非常開心(但開心得太早...)，到咗機場冇耐就傳嚟惡號... "因天氣關係，由成都開往九寨溝的CA XXX航班暫時不能降落本機埸，航班將會延遲兩小時... (半個鐘後)... 因本場天氣未能達到飛行標準，由成都開往九寨溝的CA XXX航班將會折返成都，請到一樓拿回您的行李，若有航班更新的消息，航空公司會盡快跟您聯繫，謝謝。" 所以我哋成團人都被安排到機場附近的旅館住宿一宵，standby等消息... 最擔心嘅係成都唔係日日有機飛香港，如果meet唔到聽日嗰班咪大獲?!!

上咗旅遊巴之後，我哋一直討論航空公司會安排我哋住咩旅館，話就話4星級，但我哋都有一種不詳嘅預感!! 果然不出所料，依間酒店差到爆燈，我覺得2星級都俾多佢，環境惡劣，衛生更加唔洗講，仲有一陣濃烈嘅臭味... 一入到房，冇冷氣，隻窗又冇鎖，天花嘅燈膽只得一個係work... 床頭嗰2盞壁燈仲驚，壁燈上面有2款燈式，其中一邊嘅燈罩已經崩晒，只要用隻手指輕輕咁掂吓佢，就成個壁燈倒轉，而個燈罩就直插落枕頭中間位置，命中率100%!!! 個廁所亦唔惹少，第一眼望住佢就好似望住個公廁咁，望多一秒就好似啱啱地震完咁... 成個浴屏跌咗落嚟，個毛巾架又係咁! 小弟又人有三急，梗著頭皮都要去放放水，點知一企埋個屎塔旁邊已經聞到好*壓*，去完返出去嗰時見到門後有一塊6呎乘2呎半嘅塵，去完廁所都想嚟多個second*尿震*... :O!!

間嘢咁樣我哋當然冇住啦，於是就book咗另一間酒店住... 估唔到最後一晚响九寨溝都有一個咁難忘嘅經歷!! haha!!

四川第四天(上集)：情斷黃龍

好... 今日再創新早，0530起身，雨粉飛飛，向素有中國棉花堡之稱嘅黃龍出發...!!

可能大家都太眼訓，出發時都冇特別被brief去到黃龍會係點，所以我咪諗黃龍大概同九寨溝差唔多，唔洗點行，都係睇吓山水就算... 點知... 臨落車個導遊話：「嗱，你預個半鐘頭行吓，再用一個鐘頭落返嚟，我就唔行喇，你哋慢慢嘆!」初時我喺度諗點解佢會咁講，有啲怪味，但我冇理佢就行咗去睇吓塊地圖牌，發現原來傳說中嘅人間瑤池—五彩池—喺海拔3500米高嘅山頂，而當時我哋只係响風景區嘅門口，海拔3000米，又唔可以搭cable car，因為好易有高山症，咁到底要行幾多呢(皆因我冇idea500米實際有幾高，總之就高啦...)??! 所以初時我都係好興致勃勃咁行，好似平時行山咁，又邊行邊影...

行行行行行行行行行行行... 行到見到一個叫*金沙舖地*嘅景點，我就忍唔住去問返落嚟嘅人到底仲有幾耐會見到五彩池，阿叔話：「你現在走了三分一!」我立即面都青埋，我心諗：「天啊啊(俾少少雷聲，唔該!)!! 試問我依個弱中年又點可以孭住個7.1磅嘅beams boy包包行埋嗰三分之二呢??!!!」邊行邊自怨自艾之際，又俾我行到另一個景點*爭艷池*! 依個衰池又真係幾靚，一層一層咁，仲加埋個山景，好似一幅畫咁!! 真係靚過土耳其嘅棉花堡!! 不過我真係唔想再行，但唔行又唔得，因為我要影相交功課... 再望望錶，仲有半粒鐘，睇吓行到幾多得幾多啦...

就係咁我就經歷咗三埸突如其來嘅滂沱大雨，一嘢就跑咗上去五彩池(見圖1)! 不過都好，上咗去之後我就知道我遲啲去拉薩有望，因為拉薩喺3800米，如果上到3500米都冇問題，咁就應該冇問題!! hehe!! 之後我就用咗一粒鐘跑落山... 但係... 今次一行，我就唔見咗我上年响東京買嗰條burberry毛巾仔，因為今朝怕俾雨淋到我部全世界最好嘅相機，又驚凍親佢，所以用咗條毛巾仔去包住佢... 我哋就咁情斷黃龍... 唉! 又要搵次去日本買過... V_V"

四川第三天：踏上茶馬古道

YAWNNNN~~ 好Q眼訓，唔知點解噚晚突然失眠，攤响張床度成3粒鐘先訓到，今朝又0630起身出發到九寨溝... 想死...!!!

今次我哋住嘅酒店係位於海拔2XXX米高嘅九寨天堂洲際大飯店，酒店三面環山，好似响個峽谷中間咁，係九寨溝最新建嘅酒店。唔好以為响荒山野嶺個酒店會好雞，依間嘢一啲都唔雞，一入房真係有個*嘩*一聲嘅感覺，不過間房嘅燈光就暗咗少少! 我最鍾意個露台，前面一大堆樹木，左面一大座山，勁壯觀囉!

Hehehe! 仲有，酒店嘅老闆係一個超級車癡，响大堂前就泊咗架橙色嘅Lamborghini!!! 超型呀!! 其實由噚日落機到而家，沿途睇咗唔少風景，九寨溝so far俾我嘅感覺好似蒙古+雲南+西藏，oh right... 有好多人都叫依一帶做*東藏*，因為實在太有藏族風情!!! 九寨溝位於阿壩藏族羌族自治洲的中南部，海拔約3100米，因依度有9個藏族村寨而被命名為*九寨溝*。

九寨溝的嘅地形係個英文字母「Y」字，一共有118個翠海(翠海即係呈清藍翠綠色嘅湖泊! 當地人稱湖泊為海因為佢地鍾意海，而山上冇海!)，出名嘅如熊貓海、箭竹海、花火海、諾日朗瀑布及珍珠灘等... 而每個景點之間都有免費環保巴士坐，根本唔需要點行! 同埋正就正在而家啲人驚地震，所以冇咩人嚟，可以鍾意點影就點影!! HAHAHAHA~

不過今日行程中令我最開心嘅並唔係睇到九寨溝有幾靚，而係自己有機會踏足茶馬古道!! 寫之前本書嗰時已經有提過茶馬古道係咩，簡單

嚟講，佢係古時一條從雲南到西藏拉薩嘅小路，依山而建，蜿蜒曲折，就連1:10000嘅地圖上都搵唔到，係以往雲南與外界溝通嘅橋樑! 响搵資料嘅時候已經被茶馬古道深深吸引，好想去雲南搵一搵依條路出嚟... hehehe不過點都估唔到去九寨溝時，不知不覺就踩咗上茶馬古道嘅九寨溝段!!! 超開心!!! 呀.. 補充少少嘢，小弟問過導遊，其實而家仍然可從雲南嘅茶馬古道通往九寨溝，不過就要行三年!! hahaha.. 咁樣慢慢行，一定唔會有高山反應.. hehe!! 下面就係一啲九寨溝相，但影得最好嘅我已經留咗俾報館，可以post出嚟嘅相片質素都係一般，唔好意思! hehe :P

四川第二天：我和晶晶有個約會

今次都係我咁大個仔第一次睇熊貓，雖然海洋公園都有，但次次去到都冇衝動去睇吓，而今日終於有機會去到熊貓嘅發源地四川睇一睇，好嘢!! 今日去嘅係成都大熊貓繁育研究基地，位於成都近郊，係一間非常方便同出名睇熊貓嘅地方，而北京奧運五妖福娃之一嘅”晶晶”亦係住响依度!! 晶晶今年... 唔記得幾多歲 :P，屬成年熊貓，睇到佢就完全明白點解當初會搵佢做福娃嘅藍本，因為晶晶係一隻有過度活躍症嘅大熊貓，要不停咁玩玩玩玩玩玩玩玩玩，直至玩到肚餓先可以停落嚟，真係好Q CUTE架!!!

下午搭咗40分鐘內陸機到達九寨黃龍機場，我同包包(今次嘅旅伴又係依個黑色Beams Boy包包，見圖2，重7.1磅，我就係孭住佢四圍去... V_V")安全著陸! 九寨溝嘅天空一片蔚藍，雖然有啲涼，不過空氣非常清新，未有高山反應，只係感到呼吸有啲重... 希望旅程一切順利!

四川第一天：一切還好

2個幾鐘就抵達成都，因噚晚訓得唔好，上機又俾人編咗坐aisle seat，仲要坐响2隻壞嘅大喇叭隔嚟(因為佢地把聲實在太刺耳!!!)，唔能夠專心take個nap，實在有啲pissed... 不過算啦，無謂俾依啲人影響心情嘛! 一落機第一件事要做嘅，當然就係要望吓個天—白色，已經見唔到一*舊舊*雲，只係感覺到有一大*塊*雲壓响成都上面! @_@" <-- 飈汗!

中午放飯時，由於小弟嘅任務係見嘢就影咗先，所以第一餐食四川菜又點會放過?! 於是就安排咗上菜前先俾我去第二張枱影相! 影呀影呀影呀影呀，我又唔好意思，驚人家肚餓，咁我就叫人將影完嗰啲菜上先... 點知... 一影完返埋位就發現枱上可以食嘅全部都食晒，一件不留，團友勁冇品，嗱... 依啲就叫做"各人自掃眼前餸，莫管他人食唔飽"囉! 唉... 不過我專業同大量，畢竟依班人都要對幾日，無謂面阻阻啦，所以我冇講過任何嘢!!! SEE! That's why我去旅行係唔會跟團!

今日的行程裡面聽咗唔少關於成都嘅故事，當中最為人作熟悉嘅就梗係《三國誌》! 因為成都係三國時代嘅首都，有唔少由三國時代保存至今嘅文物同古建築，每個角落背後都有一個關於三國嘅故事。成都雖然係一座古城，但市內有特色嘅小店，超型嘅餐廳、Cafe等都絕不比北京及上海遜色! 而且成都人好nice，冇(某部分)北京人咁吋，亦冇(某部分)上海人咁狡猾，總之一切還好。

出發前都有擔心會見到一啲唔開心嘅四川人，不過嚟到之後發現其實佢哋係好積極同樂觀，好值得我哋去學習。地震後傳出唔少笑話，如... 張藝謀導演為成都拍攝宣傳片時，表達咗佢都成都嘅感覺：「成都是一座來了就不想離開的城市。」地震後，成都人就話：「成都是一座來了就逃不開的城市。」因為四川是盆地，而成都喺正中央! 哈哈! 另外，有一個老伯响災區被2位俄籍的拯救人員救出，老伯的第一句話就係：「噢，這個地震那麼厲害，把我震到國外去了!」嘻嘻嘻嘻!!! 仲有一個，有個黑人地震後從某酒店跑出嚟，而救護車剛好到場，救護人員好驚訝咁話：「嘩嘩嘩，那個人燻得這麼黑還可以跑得那麼快!!」嘻嘻! 無論笑話是真是假，從中可以睇得出佢哋想要嘅就係一點點嘅歡樂。